دنياي عاشقانه

هيام

 

گؤزَلیم یاتما هَله گؤر بو گؤزوم یوخلاییب هئچ

سَنی ایستر اوره گیم ئؤزگه یه بئل باغلاییب هئچ؟

بیلیرَم سن گئده لی گؤزلریم آغلار نه قدَر

باخ بورا ئؤزگه گئدیب اونلارا گؤر آغلاییب هئچ؟

آی گؤزوم باخ گؤزونه گؤرگؤزی یورقوندی یا یوخ

یاتماییب،آغلاییب هئچ،گؤر منه یئر ساخلاییب هئچ؟

بلکه هئچ سئومی یاجاق،سئوماق اونا هئچ یاراشیر؟

یاراشیر ألبَت اونا بلکه منه قالماییب هئچ

سیزلاییرسان نه ایچین آی یارا کؤنلوم نه ایچین؟

تک جه سن سن یاداکی آیری کؤنول داغلاییب هئچ؟

گاه گئدیر گاه قاییدیر دوز سه پیر آرتیق یاراما

آجیشیر کؤنلوم آما گؤر ئؤزی بیر سیزلاییب هئچ!

یات گؤزوم یات داها سن ، قالما اویاق ،یاتدی گؤزَل

یاتمیسان دورما داها ، چون کی وفا قالماییب هئچ


برچسبـهـ ـا : ترکی شعر, تورکی شعر, شعر تورکی؛ گؤزَلیم یاتما هَله گؤر بو گؤزوم یوخلایی

♥ چهارم مهر ۱۳۹۳ ساعت 0:28 توسط اميد:

اي يار با وفا ندن ائتدون جفا منه؟
درد فراقوي نئجه گوردون روا منه
من راضي اولمارام سنه يتسين ملال و غم
گلسين سنه گلن هامي درد و بلا منه
درد فراق چاره سي ايمه وصالدور
اولماز نتيجه وئرسه له يوزمين دوا منه
غصه مدن اي گوزل نئجه گل گور سارالميشام
من كهربايه بنزيره م، كهربا منه
يا خالق ايلسين منه قسمت وصالوي
وئرسين و يا كه صبر و تحمل خدا منه
سندن سورا بو شهرده من اولموشام غريب
گويا وطنده بير سنيدون آشنا منه
دنياده بير منيم سنيدون شمع روشنيم
سنسيز اولوبدي يئراوزي ظلمت سرا منه
اولسمده من بو گونلري ياددان چيخارتمارام
مشكلدي بو زمانه ده سندن سورا منه
حسرت گؤزوم يقين قوتولار انتظاردن
وئرسه وصال مژده سي باد صبا منه
قسمت ائدنده عيش و طرب بو جماعته
اولدي نصيب ني كيمي دايم نوا منه
علت ندور كي سن مني ياددان چيخارتميسان
بي مهر اولموسان ندن اي با وفا منه؟
سلطان عشق رعيتي ام من بو شهرده
حداد اولموشام دئمه سونلر گدا منه
تاب ايلرم بو آتش هجراندا يانماقا
نمروديان عصر دئسون مرحبا منه


برچسبـهـ ـا : ترکی شعر, تورکی شعر, شعر تورکی؛ اي يار با وفا ندن ائتدون جفا منه

♥ چهارم مهر ۱۳۹۳ ساعت 0:26 توسط اميد:



Design: Bia2skin.ir